Gunnlaugur Harðarson

Gunnlaugur Harðarson

Loksins loksins, besta hjól heimsins prufað !

(ljósmyndir úr prufutúrnum fylgja)

 

Nú er komið að því, ég mun fá að prufa besta hjól heimsins, þetta er stór fullyrðing að kalla Suuzúúkíí Bandító 1200cc (blátt að lit) besta hjól heimsins en þetta hjól stendur algjörlega undir nafni. Ég skelf af spenningi og verð að segja frá því að ég hef sofið lítið undanfarna tvær nætur, því þessi dagur ætlaði aldrei að renna upp, er búin að bíða nú a.m.k. þrjú ár eftir þessari sögulegu stund. En hvað hefur tafið þessa prufu ? Jú það eru ýmsar orsakir fyrir því og ætla ég bara að nefna nokkur atriði: Vont veður af ýmsu tagi, t.d. of mikil sól, of lítil sól, rigning og/eða væntanleg rigning sem og annað sem snýr að veðri og jú landsleikur kvenna í fótbotla !! Svo má nefna ýmislegt með að “besta” hjól heimsins var ekki í standi til að standa undir nafni þann dag sem prufa átti græjuna t.d. of lítill vindur í hjólbörðum, of mikill vindur í þeim, hafði ekki verið skipt um olíu lengi (???), keðja nýsmurð eða ekki nægilega vel smurð ofl ofl. Svo var það auðvitað það sem tafði oftast og það var sjálfur eigandi “besta” hjólsins var upptekin við hin ýmsu mál t.d. að sinna ameríska Fíat klúbbnum eða öðrum svipuðum sem hann er í, eða hann var á ferðalagi með félögum í húsbílaklúbbnum Gómarnir, síðan var það fjórhjólaklúbburinn Þruman, en það sem oftast kom í veg fyrir þessa prufu var að hann eigandi “besta” hjólsins var að mála bílskúrinn heima hjá sér, þetta verður örugglega best málaði bílskúr heimsins, enda eðlilegt þar sem “besta” hjólið er geymt þar inni þær fáu stundir sem það er ekki í notkun.

Jæja aftur að “besta” hjólinu ég stend þarna og horfi með aðdáun á allar þessar fallegu línur, þetta er allt ein falleg heild, allt frá fjórum púströrum í rennilegt sætið, þessi blái litur sést aðeins í fallegum fjallavötnum. Hjólið er ekki einu sinni komið í gang en samt lítur það út fyrir að vera á 150 km hraða þarna sem það stendur hreyfingarlaust. Ég geng að því varlega já eins og að ótömdum graðhest, ég tala lágum tónum til “besta” hjólsins og bið það góðfúslega um að fá að gangsetja það. Ég sný lyklinum og síðan ýti ég á þennan fallega starttakka á stýrinu, áður hafði ég opnað fyrir innsogið og gefið græjunni örlítið inn, það tekur smá tíma að fara í gang með tveimur svona hálf sprengingum, sem er skiljanlegt því það er ókunnur maður að setja græjuna í gang. “Besta” hjólið fer í gang og hvílíkur hljómur já sjálfur Pavarotti uppá sitt besta hljómaði ekki svona vel. Þarna eru fjórir strokkar í gangi og hver og einn sendir frá sér himneskt hljóð. Mér var sagt að “besta” hjólið yrði að hitna nokkuð vel áður en lagt yrði í hann, á meðan hjólið er að hitna þá skoða ég öll þessi fallegu smáatriði sem ber fyrir augu, fallegt mælaborð, stýrið alveg rétt staðsett, standpedalarar alveg á háréttum stað, svona má lengi telja og ég skil vel að þeir sem lesa (allavega einn) þetta vilji fá miklu miklu námkvæmari lýsingu á “besta” hjólinu og ég lofa því að það kemur örugglega framhaldssaga !!

 

Nú er stundin runninn upp ég sest á hjólið (eftir að það var búið að hitna í fimmtán mínútur) og sætið já aldrei nei aldrei hef ég sest á eins þægilegt sæti, ég teygi mig í stýrið og já þetta er eins og að “besta” hjólið hafi verið smíðað sérstaklega fyrir mig. Ég tek í handbremsu og síðan kúplingu og set “besta” hjólið í gír, ja reyni það en hugsanlega er ég ekki nógu vanur svona græju því það þarf aðeins að taka á því til að koma “besta” hjólinu í gír, það gerist þó með smá smell/klikki og nú tek ég af stað eftir að hafa gengið úr skugga um að allir sem á horfa (voru örugglega tuttugu, skiljanlega) séu tilbúnir í að horfa á mig aka “besta” hjólinu í burtu, því ég ætlaði einn í þennan sérstaka prufutúr. Nú er það ég, gatan og hjólið, við erum ein heild sköpuð af himnasmiðnum sjálfum (sko hjólið, ekkert væmið er það nokkuð). Ég rétt tek á bensíngjöfinni og hjólið æðir áfram, þvílíkt afl, þvílíkt hljóð, þetta er fullkomið, ég skipti rólega um gíra og á örskömmum tíma þá er ég komin í 90 km hraða á klst. En eins og allir vita þá má ekki aka hraðar og reyndar hafði eigandi besta hjólsins bannað mér að fara hraðar en 100 km á klst. Sagðist ekki vilja að það sæist til þessa “besta” hjóls heimsins á einhverjum ólöglegum hraða, það hafi aldrei gerst og ætti ekki að gerast núna (sjá ljósmyndir).

Ég líð áfram eins og í draumi, aðeins fallegt hljóð þessa fullkomna fjögurra strokka mótors, vindurinn lendir lítið á mér jafnvel á þessum mikla hraða 95 km á klst, vindhlífin er eins og annað á þessu “besta” hjóli heimsins fullkomin. Ég kem að gatnamótum og bremsurnar virka fullkomlega og það er góð tilfinning að stöðva þarna á rauðu ljósi og finna að það horfa allir á mig, sko hjólið, jafnt gangandi sem akandi, já þvílík fullkomnun. Þessar fimmtán mínútur líða svo hratt að mér finnst að ég hafi aðeins verið eina mínútu á ferðinni. En eigandi besta hjólsins sagðist aðeins leyfa mér að prufa “besta” hjólið í fimmtán mínútur sem er skiljanlegt því hver myndi lána svona fullkomnun lengi ekki ég allavega. Stundin er runnin upp og ég stöðva fyrir framan eiganda “besta” hjólsins, sem stendur þarna strangur á svip og segir: Afhverju varstu svona lengi og fórstu nokkuð yfir 100 km á klst. Ég er bara orðlaus því hvernig segir maður frá fullkomnun ?? Það er ekki hægt, það er eins og þegar einhver spyr Harley eiganda: Af hverju Harley, þá segir Harley eigandinn: Ef þú þarft að spyrja þá skilur þú þetta ekki !! En að sjálfsögðu er það að bera saman “besta” hjólið og Harley eins og að bera saman fullkomin reiðhest og þreyttan Asna, það myndi engin jafnvel ekki Harley eigandi detta það í hug að bera saman “besta” hjólið og Harley: BESTA hjólið er fullkomnun, sköpuð í Japan.

 

Alveg sönn saga: Sem skrifuð er að beiðni eiganda “besta” hjólsins því boðorðið verður að bera út svo aðrir geti hugsanlega náð þessari fullkomnun: SKO með því að kaupa sér eins hjól ekki satt !!!!!

Bandit

Bandit 2

Bandit 3

Hann hafði hugsað um þessa ferð svo vikum skipti, já allavega í tíu mánuði og spenningurinn hafði aukist með hverjum degi því hann ætlaði að fara í þriggja daga ferðalag ásamt félögum sínum. Þó hann ætti lang besta hjól heims þá var samt mikið sem huga þarf að fyrir svona langt ferðalag !

Í það fyrsta það var að finna heppilega gistingu fyrir alla þennan hóp því a.m.k. kosti ellefu manns ætluðu að fara í þessa löngu og erfiðu ferð því nú átti að aka a.m.k. 500 km aðra leiðina og ca. 1200 km alls, já svona ferðalag krefst mikils af mönnum og eins gott að vera vel undirbúin.

Gisting er fengin í tveimur tíu fermetra timburhúsum sem í raun hýsa bara fjóra í hvoru en þessi hópur er vel stemmdur og þekkjast vel. Lítið mál að þó nokkrir hrjóti og leysi vind nær stöðugt, hvað eru þrjár nætur undir smá hljóðum frá báðum endum. Kannski verra að það er bara ein snyrting og hún er inní þessum tíu fermetrum. En það er einn stór plús: Fjögurra manna heitur potur á milli húsanna og hvað er dásamlegra en heitur pottur með tíu öðrum sveittum körlum, já í potti sem tekur bara fjóra !!

Minn maður hóf yfirferð á besta hjólinu um átta mánuðum fyrir ferðalagið og það var að ýmsu að huga fyrir þessa ferð. T.d. eru hjólbarðar nógu góðir fyrir þessa 1000 km, mun drifkeðja halda þetta út, það þarf að skipta um olíu og síu, það þarf að smyrja barka sem og annað sem smyrja þarf. Nú svo verður auðvitað að bóna hjólið nokkrum sinnum svo það haldi sínum eðalgljáa.

Olíuskipti gengu vel fyrir sig og ekki mikið af olíu fór á gólfið í skúrnum og þó, jú við síuskipti þá lak nokkuð af olíu á gólfið og minnti minn mann á umtal um leka Harley eða hvað þá gamla breta. En minn maður náði að þrífa þetta áður en eiginkonan skammar hann fyrir bölvaðan sóðaskap eina ferðina enn. Svo tók við smurherferð á börkum, alls konar nipplum ofl. Það var bölvaður hausverkur að ná undan dekkjum á þessari grjæu, já þessar leiðbeiningar frá hrísgjónalandi eru alltof flóknar fyrir minn mann, en að lokum hafðist þetta og nú var farið á næsta viðurkennda dekkjaverkstæði með báðar felgur til að nálgast nýja hjólbarða, sem svona okkar á milli voru ekki alveg nýir, þeir voru nokkurra ára gamlir og því á góðu verði. Já minn maður hafði lært ýmislegt af félögum sínum og þá sérstaklega einum sem segir stöðugt: afsláttur og já allt frítt er gott !!

Nýju gömlu hjólbarðarnir eru komnir undir og ekki voru leiðbeiningarnar um hvernig ætti að setja þetta undir betri úff alltof flókið. En við hjólbarðaskipti tók minn maður eftir því að drifkeðja hafði ekki verið smurð í a.m.k. mánuð ! Nú eru liðnir nokkuð margir mánuðir og minn maður er marg búin að fara yfir besta hjólið og hefur ekkert notað það þó ýmiss tækifæri hafi blasað við. Nei eftir að hafa bónað hjólið ca. níu sinnum þessa átta mánuði þá var eftir að fara eina yfirferð enn með sérstöku hlífðarbóni.

Dagurinn nálgast og spenningurinn sem og smá kvíði eykst, það þarf líka að pakka og konan hans neitar að pakka fyrir hann, hún segir bara þú getur sjálfur pakkað fyrir þessa hommaferð. Hann hugsar: Hvaða hvaða það er bara einn slíkur í þessum hóp og hann ætlar ekki með ! Minn maður er í vandræðum með að koma öllu fyrir því sem nauðsynlegt er að taka með. T.d. fjórar nærbuxur, tíu sokkar, átta bolir, fimm peysur, fjórar gallabuxur og einar sparibuxur, þrennar skyrtur, gönguskór, strigaskór, inniskór (konan bannar honum að ganga á sokkaleystunum), sundskýla, regngalli, goritexgalli, mótorhjólaklossar, vatnsheldar hlífar yfir klossa, tveir hjálmar ??, tvenn sólgleraugu, fernir hanskar af ýmsum gerðum og það minnir hann á að skoða hvort hitahandföngin á hjólinu virki. Síðan eru það ýmiss verkfæri, auka olía, olía fyrir keðju. Síðan auðvitað hreinsiefni fyrir hjólið og tuskur.

 

Jæja búið að hlaða hjólið og það eru tíu dagar í ferðina löngu, það lítur út eins og cameldýr sem ætlar að fara yfir stóra eyðimörk, er það ofhlaðið, nei ætti að vera í lagi, þó á bestahjólinu séu hliðartöskur, topptaska og tanktaska, kannsi ætti hann að hafa bakpoka fyrir nesti sem konan hefur tekið til fyrir hann og já nesti fyrir þrjá daga tekur líka sitt pláss. Svo má auðvitað ekki gleyma guðaveigunum sem konan má ekki vita af og þær verða faldar þangað til daginn sem lagt er í hann og þá þeim laumað á góðan stað. Vonandi duga þessir tveir viskípelar, ja hann ætlar að gefa með sér, já þrír bjórar fylgja með líka, nú ætlar minn maður að detta í það !! Það verður gaman að skála við félaga sína í heita pottinum.

Það er á morgun og minn maður sefur ekkert, hann hafði tekið sér tveggja daga frí fyrir ferðina, því það þarf að vera vel undirbúin. Síðasta nóttin er löng og honum kemur varla dúr á auga, maginn er í hnút og spenningurinn er að fara með hann, þetta verður sko gaman. Konan fer ekki á fætur á undan honum og kvartar yfir því að morgunmaturinn sé ekki tilbúin eins og venjan er ! En minn maður var lystarlaus með öllu. Það tók smá tíma að róa konuna og lagaðist ekki fyrr en á öðrum kaffibolla, eftir þrjú egg bacon og ristað brauð fyrir elskuna hans. Hún kveður hann ekki heldur bara spyr hvort hann verði komin heim svo hann geti græjað sunnudagsmatinn að vanda !!

Besta hjólið er lengi í gang og kannski ekki skrítið því það er örugglega spennt lika. Svo er það tékklistinn frá konunni, síðan hjólið skoðað vel með það er að hitna því eins og allir vita fer engin af stað áður en vél hjólsins er orðin vel heit. Minn maður drepur þrisvar á hjólinu áður en hann kemst af stað, hendur skjálfa aðeins. Hann ekur rólega að þeim stað þar sem hópurinn mun hittast og hann er mættur 45 mínútum áður en lagt er af stað, það mun engin þurfa að bíða eftir honum.

Menn mæta síðan koll af kolli, spjalla saman um væntanlega ferð og skoða hjóla hvors annars, hvaða hjól er mest skoðað ? Jú auðvitað besta hjólið og menn svona velta fyrir sér hvað allur þessi farangur sé að gera á hjólinu, ætli hann sé að taka fyrir hluta hópsins, því sumir eru bara með lítinn bakpoka ! Minn maður furðar sig á þessu kæruleysi, að leggjast í svona ferðalag ílla undirbúin, en það ekki hans mál en hann hugsar: Ég get allavega aðstoðað eins og vanalega í þessum ferðalögum, hann man vel eftir manninum sem lagði af stað á nær ónýtu afturdekki og sá á meira segja heildsölu sem selur hjólbarða, svo var það einn sem ók á tegund frá landi furðulegra forseta og sú græja bilaði auðvitað og minn maður var sá eini með verkfæri, en það hjálpaði ekki til í það sinnið, eins og búast mátti við af því hjóli hugsar hann.

Hann fer yfir reglur um hópakstur og minnir menn á hámarkshraða, menn eigi að halda hópinn og fara aldrei yfir 95 km hraða á klst. Bannað sé að lyfta framdekki, sem verður erfitt fyrir minn mann því besta hjólið er svo yfirhlaðið að aftan ! Nokkrir eru enn að setja bensín á sín hjól og aðrir þurfa að bíða á meðan, uss agaleysi hugsar minn maður.

Ferðin er hafin og minn maður leiði hópinn sinn og nú verður ekki stoppað fyrr en eftir námkvæmlega eina klukkustund, því ekki má þreyta menn, þreyttir menn eru hættulegir í umferðinni. Ferðin gengur hægt og mikið er um framúrakstur af öðrum ökutækjum, já þessir helvítis fávitar á húsbílum kunna ekki umferðareglurnar hugsar minn maður með sér þegar Fíat húsbíll ekur með ógnarhraða fram úr öllum hópnum, já meira segja í brekku. Þessi á Fíatinum veifar eins og óður maður þegar hann fer framúr og eflaust vegna þess að minn maður er félagi í húsbílaklúbb sem heitir: Gómarnir !!

 

Ferðalagið gengur vel, veðrið er gott og þessi stopp  einu sinni á klukkustunda fresti gera gæfumuninn, allir eru vel stemmdir, þó sumir séu eitthvað að tala um að gista á leiðinni, minn maður veit ekki til þessi að það ætti að gista á  leiðinni og hvers vegna þetta eru ekki nema rúmir 400 km á áfangastað. Þó ákveðið sé að hvert stopp sé nákvæmlega fimmtán mínútur, þá þarf alltaf að bíða eftir einhverjum og þá aðallega þessum sjúklingum sem enn reykja, minn maður hugsar með sér: eins gott að ég hætti þegar konan mín sagði mér það, en hún reykir nú enn svona þegar hún dettur í það allavega, en það er hennar mál að sjálfsögðu !

Áfangastaður nálgast og ekkert markvert hefur gerst á leiðinni nema í nágrenni við einn bæinn á leiðinni stöðvaði lögreglan þá og vildi vita hver ástæðan væri fyrir þessari lestarmyndun ? Já þessar löggur á þessum stað ættu nú að hugsa frekar um þennan hraðasktur sem þeir eru frægir fyrir að reyna að halda niðri. Þó minn maður bendi löggunni á óða manninn á Fíat húsbílnum þá verður sú löggan bara verri og segir: Ertu að grínast !! Já þessar löggur eru sérstakar, ætli þær verði ekki bráðum vopnaðar við öll og engin tækifæri, þá er eins og gott að segja ekki neitt því eflaust yrði vopninu beitt!!

Nú sjást þessi tvö fallegu hús og þau virðast nokkuð minni en ljósmyndir sýndu á heimasíðunni, malarvegurinn að húsunum hefur ekki verið heflaður í mjög mörg ár og það eru svo margar holur á honum að það gengur ekkert að forðast þær, það er hola við holu og að auki eru þær fullar af regnvatni og auðséð að það hafi ringt töluvert áður en hópurinn kom. Erfiðlega gengur að leggja hjólunum við húsin því jörð er blaut og hliðarstandarar síga niður í grasið, menn verða finna sér eitthvað til að setja undir þá svo hjólin haldist upprétt. Minn maður verður að finna stóra spítu því hjólið hans er frekar þungt !!

Húsin eru opnuð og á móti þeim taka óboðnir gestir í miklum mæli, það eru hundruðir af flugum þarna inni, lyktin er ekki góð og húsin virðast ekki hafa verið notuð lengi, það eru tvær tveggja manna kojur í hvoru húsi og við erum tólf með mér hugsar formaðurinn, átta manns í kojum og hinir á gólfinu, engar aukadýnur sjáanlegar en það eru lausar “sessur” í þessum eina sóffa í hvoru húsi, já þetta reddast hugsar minn maður þó sumir í hópnum séu farnir að tala um hver hafi pantað þetta og þeir ætli að fara leita sér að gistingu. Minn maður bendir á heitapottinn og segir til að létta á andrúmsloftinu: Nú fáum við okkur aðeins í tána og látum rennan í pottinn !! Það tekur nokkurn tíma að finna út hvernig eigi að láta renna í pottinn og það er auðséð að hann hefur ekki verið þrifinn í nokkuð langan tíma. Vatnið byrjar að renna og það er svona kakóbrúnt fyrstu tíu mínúturnar og að lokum verður það svona smá litað og minn maður brosir, dregur fram annan pelann sem hann faldi fyrir konunni. Bíður félögum sínum og þegar hann fær til baka er hann tómur !

Sumir eru að reyna að kveikja á grillinu og það gengur ekki alltof vel því brennarinn er ja svona aðeins ryðgaður og gasir flæðir frekar frjálslega, en þetta hefst og menn ætla að brenna af grindinni því hún ber þess merki að hún hafi ekki verið þrifin í langan tíma. Það komast fimm í pottinn í einu og þá með því að einn sitji í miðjunni, en þessir fimm ætla sér að nota hann og eru orðnir hressir og kalla stöðugt á meiri bjór og smá snaps, spyrja líka hvenær á að borða. Seinni pelinn er líka búinn og minn maður á bara einn bjór eftir !! Kvöldið er skemmtilegt menn vaða úr pottinum að grillinu, ná sér í brennda kótellettu og svo aftur í pottinn, það er orðin drulluslóð að pottinum að grillinu og inní bæði húsin, menn eru hættir að pissa inni því þetta eina klósett tekur ekki alltof vel við þegar sturtað er niður, eflaust er rotþróin full !! Kvöldið líður hratt og menn fara reyna koma sér fyrir, það var ákveðið að þessir yngstu fengju kojur og þessir gömlu væru á gólfinu, því þeir kæmust hvort er eð ekki uppí efri kojur !!

 

Minn maður á erfiða nótt, hann náði engum púða og þakkar nú fyrir að taka með sér öll þessi aukaföt, því hann liggur á þeim. Hrotur og búkhljóð eru á þeim nótum að það hefði verið betra að sofa á lestarstöð á háannatíma, en þetta var ódýrt og á heppilegum stað, já ekki nema þrjátíu km niður á aðalveginn og svo tíu km í næsta bæ. Menn eru líka að fara út til að pissa alla nóttina, því flestir voru með nóg af bjór fyrir sig. Minn maður liggur þarna og hugsar hvað þetta sé æði og gaman, hvað besta hjólið hafi farið vel með hann, enn þá allt í einu er stigið á lærið á honum og það hressilega og sá sem er þarna á ferð, hefur engar áhyggjur af því heldur rekur hressilega við og segir upphátt uss ég þarf að pissa aftur og nýbúin !!

Morgunverður á borðum kallar minn maður því klukkan er orðin átta og nú skal haldið í smá ferðalag um nágrennið og skoða fallegan foss sem og einhverja gamla kirkju. En menn eru eitthvað þreyttir, enda búnir að vera í löngu ferðalagi. Klukkan er orðin hálf ellefu og nú eru menn loksins komnir á fætur, sumir fara beint í pottinn sem er likari drullupotti en heitum potti, þrátt fyrir að gleymst hafi að skrúfa fyrir rennslið í hann, já menn eru líka fá sér smá bjór með þurru fransbrauði. Að lokum eru það fimm sem halda í þessa stuttu skoðunarferð um nágrennið og sú ferð er bara góð, minn maður kemst á klósettið í næsta bæ og fær sér líka aðeins að borða, því einhverjir borðuðu matinn hans sem konan hafði tekið til, en alltaf gaman að gleðja félaga sína.

Þegar komið er til baka er mikið stuð á staðnum, potturinn góði er í fullri notkun og grillið er líka í gangi, það eru pappadiskar útum allt utandyra sem innan, ásamt tómum bjórdósum. Þessir fimm eru varla búnir að leggja hjólunum þegar einn þeirra sem eftir varð kallar: Þið verið að drífa ykkur í næsta bæ og kaupa meira “bús” áður en lokað er. Minn maður segist redda þessu og leggur aftur af stað ásamt einum öðrum sem segist hvort er eða þurfa kaupa meiri mat fyrir sig. Kvöldið líður eins og fyrra kvöldið sem og nóttin, minn maður er orðin mjög þreyttur og sefur ekkert því hann drakk ekki mikið. En þetta er frábært góðir félagar og mikið fjör.

Helgin er liðin með tveimur skoðunarferðum fimm í þeirri fyrri en aðeins þrír í þeirri seinni !! Nú skal haldið heim, menn eru mislengi að vakna og því erfitt að fara að taka til. En minn maður fór framúr kl. sjö og fór að hreinsa upp rusl utandyra, síðan reynt að þrífa pottinn sem í raun gekk ekki, en leiguskilmálar voru á þeim nótum að húsunum yrði skilað hreinum og ekkert rusl á staðnum !! Það er ekki fyrr en uppúr tíu að fyrstu menn fara á fætur og röfla um að gott væri að fá eitthvað að borða, því löng ferð sé í vændum. Það er með herkjum að menn fást til að hjálpa við að taka til, en að lokum er þetta komið, þrír úr hópnum taka að sér að ferja rusl, en minn maður getur ekkert tekið því hans hjól er fullhlaðið. Lagt er af stað, veðrið er fallegt eins og það hefur verið alla helgina og minn maður minnir alla á að halda hópinn og huga að umferðahraða.

Það er stöðvað í næsta bæ og þessir þrír losa sig við allt ruslið og sumir fá sér puslu og kók, eða annað, minn maður fær sér tvær pulsur því hann er svangur vel. Menn tala ekki mikið en minnast á frábæra helgi og þynnku. Lagt er stað og það líður ekki langur tími þangað til allt í einu: Einn úr hópnum tekur framúr hinum og hverfur augsýn, það fylgja honum aðrir þrír skömmu síðar. Að lokum er það minn maður og sá næst elsti sem eftir eru og halda sér á réttum ökuhraða, en menn verða fá að spretta úr spori og þá sérstakleg þessir yngri, maður er ungur og leikur sér hugsar minn maður með sér. Að lokum er heim komið eftir frábæra helgi og minn maður getur ekki beðið eftir næstu ferð á næsta ári. Hann gengur frá hjólinu og öllum búnaði því annars myndi konan taka hann á teppið. Það er engin heima svo minn maður fer að þrífa hjólið og ekki veitir af því það er skítugt mjög, hann er varla hálfnaður þegar konan kemur heim og heilsar með orðunum: Er maturinn ekki að vera til, Sigga frænka og Gunni eru að koma í mat eftir hálftíma !!!!

Höfundur er:  fer aldrei í ferðalög, því konan gefur ekki leyfi !!

Heitur pottur

Saturday, 20 May 2017 18:17

Mótorhjólaskógur

Formaðurinn og gjaldkerinn fóru í hina árlegu skógræktarferð í dag.

Það er góður árangur af þessu starfi þrátt fyrir að þetta sé langt inni í landi og hátt yfir sjávarmáli.

Sjá myndir í nýju albúmi.

Einnig er hér linkur á myndband sem BMW klúbburinn gerði um ferð sína í mótorhjólaskóginn 2017.

https://vimeo.com/218549095

 

Friday, 21 April 2017 20:31

BIKE CAVE - tilboð

Bike cave býður öllum félögum Gaflara hamborgara, franskar og gos á kr. 1.495,-

Þeir eru staðsettir í Hafnarborg og í Skerjafirði, http://www.bikecave.is/

 

Wednesday, 05 April 2017 18:44

Rétt leið til að Selja mótorhjól !

Ekki fyrir svo mjög löngu auglýsti eigandi Sússsúkíí hjólið sitt og þetta var meira að segja Bandító 1200 semsagt hið fullkomna mótorhjól. En ekki var mikill áhugi á þessu hjóli, skrítið miðað við að eins og við vitum öll að þetta er ekki bara besta hjólið heldur langbesta hjólið !!

En hvernig sem eigandi besta hjólsins reyndi þá var ekki mikill áhugi, hann jafnvel lækkaði verðið, hann fékk nokkur tilboð en þau voru öll langt undir eðlilegu verði fyrir besta hjólið. Já þetta voru bara dónatilboð, því hjólið var meira segja með nýjum hjólbörðum og alveg nýrri olíu, já ekki dónalega að fá besta hjólið tilbúið til notkunar.

Það eru liðnar nokkrar vikur og já jafnvel nokkrir mánuðir frá því besta hjólið var auglýst og enn eru þetta bara “heimsk” tilboð frá mönnum sem aldrei hafa átt SússsúKíí og hvað þá Bandító og skilja þetta bara ekki, (hugsanlega ætti að halda fræðslufund um ágæti þessara hjóla !). Þar sem þetta er bara bullsaga þá er ekki vitað um líðan eiganda besta hjólsins, leið honum ílla og var orðin vonlaus, nei örugglega ekki því hann á enn Besta hjólið ekki satt.

Svo var það eitt kvöldið að haldin var fundur hjá besta klúbb heimsins og þarna átti að fara yfir liðið ár, t.d. hvað hafi verið gert, ferðalög, samkomur og skemmtanir, reikningar ársins og allt var þetta eins og árið á undan: FLOTT. Svo var komið að kosningu stjórnar (hvað kemur þetta sölu besta hjólsins við !!!) og undur og stórmerki hún stóðst áhlaup manna sem vildu í stjórn eða þannig !!

En þar sem mönnum stundum leiðist á svona fundum þá fór í gang umtal um besta hjólið og það væri eitt svoleiðis til sölu, menn lifnuðu við, nú var eitthvað að gerast á fundinum góða og reyndar varð aðal umtalið um af hverju menn væru nú yfirleitt að selja svona eðalgripi, það ætti aldrei að gera. Eins og alltaf eru allir með “snjallsíma” og fóru að skoða myndir af þessum glæsilega Bandító sem var reyndar ekki í rétta litnum. Fljótlega sagði einn fundarmanna (sem telur breskt best og hefur því ekkert vit á mótorhjólum): Þetta eru frábær kaup og glotti, næsti maður sagði já algjör snilld og fljótlega voru menn farnir að senda skilaboð á eiganda besta hjólsins, skilaboð þessi innihéldu tilboð í besta hjólið en frekar lág tilboð. Sá sem á bara ónýt hjól (Bresk) sagðist ætla að kaupa Besta hjólið því formaðurinn (nýkjörin með eins atkvæða mun !!) hefði sagt honum að Sússsúkíí laus maður væri eins og pu%&ulaus gleðikona. Leikar æsast og nú er stór hluti fundarmanna farnir að gera tilboð og allt í einu er besta hjólið orðið “mega” eftirsótt. Ekki er vitað hvort Sússsúkíí Bandító hafi selst þetta kvöld en máttur umtalsins virkaði: Einn segist ætla kaupa og ekki líður á löngu þangað til öllum langar í besta hjólið.

Niðurlag: Munið bara ef þið ætlið að selja hjól þá að biðja einn félagann um að segja frá áhuga sínum að kaupa gripinn og helst að fá tvo sem segjast ætla að kaupa græjuna og það er öruggt að fljótlega vilja nær allir eignast: Besta hjólið !!

Höfundur er óþekktur (því hver vill setja nafn sitt við svona bull).

bandit 1200

Sunday, 02 April 2017 18:24

John Surtees

John Surtees kappaksturshetja sem varð bæði heimsmeistari á mótorhjólum og bíl.

 

Surtees 1 

Hver þekkir ekki þetta nafn sem er hér að ofan, allavega flestir sem eru komnir eins og sagt er: Til vits eða ára ! John fæddist á því herrans ári 1934, sonur eiganda og umboðsmanns mótorhjóla í London. John var ekki gamall þegar hann vann sinn fyrsta kappakstur og þá sem farþegi í hliðarvagni á Vincent mótorhjóli sem faðir hans ók, en feðgarnir voru dæmdir úr keppni vegna ungs aldurs John. Fyrsta alvöru keppnin sem John tók þátt í var þegar hann var fimmtán ára og þá í keppni sem fram fór á grasi.

Sextán ára var John farinn að vinna sem nemi í Vincent verksmiðjunum. Það leið ekki á löngu þangað til John var farin að stríða frægum kappaaksturshetjum og fór hann fljótlega að keppa á Norton keppnishjólum sem Norton verksmiðjunar létu hann hafa eftir að yfirmaður að nafni Joe Craig í keppnisdeild Norton sá hvað ungi maðurinn gat. Á fyrsta ári sínu þ.e.a.s. árið 1955 hafði John afrekað það að vinna þáverandi heimsmeistara Geoff Duke á Silverstone og einnig á Brands Hatch. En Norton verksmiðjurnar voru ekki fjárhagslega stöndugar og því ákvað John að fara keppa fyrir MV Augusta og ítalarnir kölluðu hann fljótlega Filio del vento= Sonur vindsins !

Árið eftir eða 1956 vann John sinn fyrsta heimsmeistartitil á MV Augusta, en árið eftir var ekki eins skemmtilegt fyrir John því Gilera sem og Moto Guzzi hjólin voru betri og John náði aðeins !! þriðja sæti í heimsmeistarkeppninni. En Gilera og Moto Guzzi hættu keppni í Grand Prix í lok ársins 1957 og því var það ekki erfitt fyrir John (og þó) að verða heimsmeistari árin 1958-1959 og 1960, John vann 32 keppnir af 39 sem hann tók þátt í, einnig var hann fyrsti maðurinn til að vinna Senior TT á Isle of Man þrjú ár í röð.

Árið 1960 ákveður John sem þá var tuttugu og sex ára að snúna sér að akstri kappaksturbíla og hans fyrsta keppni í formúlu 1 var á Silverstone brautinni og þá keppti hann fyrir Team Lotus. Í sinni annarri keppni náði hann öðru sætinu og keppti fyrir nokkur lið, en á árinu 1963 keppti hann fyrir Scuderia Ferrari og strax árið eftir varð hann heimsmeistari. Ekki var þetta allt dans á rósum því John slasaðist ílla árið 1965 þegar hann keppti í Ontario Kanada og brotnaði John mjög illa og það illa að sagt var að önnur hlið líkama hans hafi styðst um fjórar tommur. Honum var “tjaslað” saman án uppskurða að mestu leiti og náði sér nokkuð vel.

John hætti hjá Ferrari eftir að þeir sögðu við hann: Þú ert ekki í formi til að taka þátt í 24 tíma kappakstri vegna óphappsins, en John taldi sig vera í fínu formi og hætti því hjá Ferrari mjög ósáttur og fór yfir Cooper Maserati og náði öðru sætinu í heimsmeistarakeppninni þ.e.a.s. á stigum sem ökumaður. Hann ók síðan fyrir t.d. Honda, en stofnaði síðan sitt eigið lið árið 1970, en hætti sjálfur að keppa fyrir alvöru tveimur árum síðar.

 

John gerði ýmislegt eftir að hann hætti að keppa t.d. var með mótorhjólaumboð, Hondu bílaumboð. John Surtees kvaddi okkur 10. mars síðastliðinn. Engin annar hefur leikið það eftir að vinna bæði heimsmeistara titil í Grand prix mótorhjóla og Formúlu 1, þó t.d. Mike “the bike” Hailwood hafi gert það nokkuð gott í kappakstri á bílum. Blessuð sé minning þessa snillings, sem varð heimsmeistari árin 1956, 1958, 1959 og 1960 á mótorhjóli og síðan á heimsmeistari í Formúlu 1 árið 1964. Ekki má gleyma því að Surtees var heiðraður á ýmsan máta meðan hann lifði og lesa má miklu meira um hann á netinu sem og annarsstaðar.

 

Höfundur er félagi í Göflurum

Surtees 2

Thursday, 30 March 2017 18:44

Ekki til betra Mótorhjól !!

Söguhetjan sem heitir Victory John er búin að kaupa sér draumhjólið, fram að þessu hefur hann sagt öllum sem nenna að hlusta SKO Súúúsúkíí er í lang besta mótorhjólið í heiminum, enda allt gott sem kemur frá hrísgrjónalandi og toppurinn kemur að sjálfsögðu frá Súúúsúkíí ! Victory John hafði meira segja einu sinni leigt sér hjól framleitt í landi mannsins sem ætlar að bjarga Mexícó frá USA ! Eftir að hafa hjólað á þessari framangreindu loftpressu í nokkra daga þá sagði hann, uss uss hver í andskotanum dettur í hug að framleiða svona endemis drasl og bætti við ég fæ í bakið um leið og ég sest á þetta, sætið er alltof mjúkt, stýrið alltof hátt, meira segja eru ekki standpedlarar á þessu járnadrasli nei heldur bara svona gangstéttir, já meira segja útvarp, hver í fjandanum þarf útvarp sem ekur mótorhjóli ??!!

H-D -2

Þessi rúmlega vikuleiga á þessu handónýta drasli hafði þau áhrif að Victory John fór á heilsuhæli fyrir eldri borgara svona svipað og heilsuhælið í Hvergerði, en var vísað í burtu eftir þrjá daga því hann talaði stanslaust um Súúúsúkíí já meira segja uppúr svefni, einnig var hann nappaður við að fá sér hamborgara í næsta nágrenni meðan hann átti að borða bara “rissóttó” og kál !!

En nú hefur söguhetjan stolist til að vera á netinu í nokkuð langan tíma, konan hans hélt meira segja að hann væri að skoða einhverjar vafasamar síður (varla á hans aldri). En nei hann var að skoða hjól framleidd (að sögn) í guðs eigin landi þar sem allt er stórt og nær allir geta orðið forsetar. Já hann var enn sannfærðari eftir að hann heimsótti fræga bensínstöð þar sem réði ríkjum maður sem átti Eina Rétta hjólið. Þessi eigandi bensínstöðvarinnar var í raun “prestur” þ.e.a.s. hann boðaði hina einu sönnu trú: H-D trúna !! Annað væri villutrú og þeir sem trúðu öðru voru bannfærðir, meira segja var þeim sem óku öðru en einu réttu tegundinni bannað að leggja við bensínstöðina, allavega þá þannig að ekki sæist til hjólanna frá bensínstöðinni, sem kölluð er H-D Heaven.

H-D-3

Victory John hafði lagt SúúúSúkíí hjóli sínu í nokkurri fjarlægð frá H-D Heaven og gekk varlega að bensínstöðinni því eins og vitað er þá á “presturinn” mikið af vopnum og hikar ekki við að nota þau við rétt tækifæri (villutrúarmenn ??!!). Victory John lét sig hafa það að ganga inná bensínstöðina og biðja um kaffi og spurði um leið er eigandinn við: Svarið var kaffið kostar fyrir þig 10 dollara, en ef þú værir réttrar trúar fengir þú það frítt !! Victory John endurtekur spurningu sína: Er Hann við ?? En var varla búin að sleppa orðinu þegar Hann gengur inní afgreiðsluna og segir: Ertu komin til að taka boðskapnum ??!!! Victory John horfir í augu Hans sem er í raun erfitt því Hann horfir alltaf í hinar ýmsu áttir enda í sambandi við H-D guðinn, en segir JÁ ég vill sannfærast og taka hina einu sönnu trú !!

H-D-4

Ekki segir meira af þessu samtali Victory John og “prestsins”, en ekki mörgum dögum síðar sést maður klæddur hettupeysu og með sólgleraugu ganga inní eina rétta umboðið og panta sér það sem sumar kalla pysluvagn eða ísskáp, en heitir víst Touring H-D. Þessi hjól koma með svo mörgum vindhlífum að stæðstu skútur eru ekki með eins mörg segl, svo eru þau með gangstéttum, hita í handföngum, hita í sætum, svo mikið af töskum að kona Victory John verður örugglega hér eftir með í öllum ferðalögum. Hjólin koma líka með útvarpi, talstöð og blá tönn, þannig að þú getur verið í sambandi við allt sem nema kannski almættið ! Þegar Victory John spyr hvort önnur mótorhjól eins og t.d. SúúúSúkíí séu tekin uppí kaupverð pylsuvagnsins er horft á hann eins og hann sé ekki með allar tengingar tengdar og sagt: NEI en ekkert mál að fara með “þetta” í næstu endurvinnslu !!

H-D-5

Dagurinn er runninn upp og Victory John er búin að ná í eina rétta hjólið og nú brunar hann hraðbrautina með græjurnar í botni og hlustar á góðan blues með Muddy Waters og Robert Johnson. H-Dinn og hann eru eitt, Victory John hugsar: Af hverju er ég ekki fyrir löngu búin að gera þetta, það horfa allir á mig, ég er líka klæddur í “chaps”, leðurjakka merktan einu réttu tegundinni, með kögurhanska, opin hjálm og H-D gleraugu, skó, já meira segja H-D bol. Hjólið er fallega blátt og smá svart, krómið er svo mikið að Victory John fær glýju í augun eins gott að vera með H-D sólgleraugu. Victory John hugsar hlýlega til “prestsins og einnig rugludallsins sem segir að: Breskt sé best, sem hafði einnig sagt honum að H-D væru bara alveg jafn góð hjól og önnur jafnvel Bresk !!

Jafnvel H-D-1

Leiðin liggur heim til Victory John því konan bíður og þau ætla í ferðalag, kona hans hafði fyrir löngu síðan sagt honum að þessi hjól væru lang bestu ferðahjól í heimi, frábær sæti, enn betri hljómflutningsgræjur, meira segja GPS, svo mætti taka með átta skópör, fullt af fötum og jafnvel hárblásara og straujárn, já allt sem konur þurfa að taka með sér í ferðalög. Victory John er búin að slá í gegn ekki bara heimafyrir Nei einnig í klúbbnum sínum sem telja hann sé nú maður með mönnum, reyndar hefur Victory John ekki sagt þeim að hann yfirgefi þá fljótlega því hann verði að ganga í rétta trúarhópinn H-D. En hverju skiptir það þegar maður á H-D.

Jafnvel H-D

Höfundur er algjörlega óþekkur + T

H-D

 

Monday, 27 March 2017 16:52

Helgarferðin STÓRA

Enn eru nokkur gistirými laus í helgarferðina okkar til Akureyrar 15-18 júní n,k,

Vegna skipulagningar á gistingunni verðum við að fá að vita fyrir mánudaginn 12 apríl n.k. hvort einhverjir fleiri félagar hafa hug á að koma með í ferðina og eins þeir sem búnir eru að bóka en eiga eftir að greiða þáttökugjaldið geri það fyrir mánudaginn 12 apríl.  Því þá verðum við að staðfesta endanlegann fjölda í gistingu. 

Kveðja

Stórnin.

Thursday, 23 March 2017 18:18

Hér um árið

Hjólaferðalög eru alltaf skemmtileg og þá aðallega þegar eitthvað gerist í ferðinni og þá er ekki verið að tala um kvennafar eða að detta í það, nei það fylgir alltaf ekki satt og er ekki í frásögur færandi! Þessi ferð var ákvörðun þriggja félaga af sex og nú átti að heimsækja nesið með jöklinum. Fimm okkar áttum gömul hjól og já sumir jafnvel fleirri en eitt, allt breskt því breskt er best. Þessi eini sem flýgur um loftin blá átti að fá lánað hjól frá einum í hópnum.

 

Þrátt fyrir að þetta væri ekki löng ferð (tvær nætur) var smá undirbúningur með hjólin, svona tékka á olíu, keðju o.s.frv. En ekki leið á löngu þangað til dagurinn er runnin upp, það er fallegt veður og sól. Lagt er af stað og ekki líður á löngu þangað til sá sem alltaf er beðið eftir (er ekki alltaf einn slíkur í öllum hópum !!) óskar eftir því að stöðva í tómstundabúð íslendinga (ríkið fyrir hin ykkar) til að kaupa einn bjór eða þannig SKO. Við erum ný lagðir af stað frá tómstundabúðinni þegar sá tímalausi bendir á bensíntank sinn og stöðvað er við næstu bensínstöð !!

 

Hvalfjörðurinn er tekin og það er ekki löng leið að fyrsta áfangastað, en það er við vatn eitt sem er í nágrenni við nokkuð fræga laxveiðiá, þessi fyrsti áfangastaður er sumarbústaður í eigu foreldra eins okkar. Þarna skal áð, síðan grillað og fá sér einn öl ! Kvöldið er skemmtilegt þarna í bústaðnum, mikið bullað um mótorhjól og allt sem fylgir því að eiga Breskt er best, þessi eini hjólalausi skilur ekkert í okkur að vilja ekki ræða um flug og flugvélar, heldur bara olíuleka breta (orð flugmannsins).

Morguninn heilsar okkar með fallegu veðri og við fáum okkur morgunmat og gerum okkur svo klára til að leggja af stað, allir komnir með hjálm á höfuðið og klárir að leggja í hann, þá kemur sá tímalausi og segist þurfa að borða aðeins !! Menn drepa á hjólum og taka saman spjall um þann tímalausa en eru ekkert að æsa sig yfir honum því við þekkjum hann allir. En nú skal haldið á nesið með viðkomu í Borgarnesi, þar er stöðvað og fengið sér kaffi og smá bensín. Öll hjólin sem eru fjórir Triumph, einn Norton og eitt BSA, sem sagt allt það besta frá Englandi.

Leiðin á nesið þar sem stefnt er á sveitabýli eitt þar sem boðið er uppá gistingu og jafnvel heitan pott. Nokkru áður en komið er á áfangastað þá springur “eina” öryggið í besta hjólinu (Norton) og sem betur fer eins og allir alvöru hjólamenn vita þá er meðferðis aukaöryggi. Við komumst á áfangastað, ja eftir nokkur stopp til að bíða eftir þeim tímalausa sem telur það eðlilegt að allir bíði eftir honum, við hinir teljum að sá tímalausi sé fullur af kvenhormónum eða sé komin af ítölsku kóngafólki !!

 

Gamli sveitabærinn blasir við og það er tekið á móti okkur af ungri konu sem segist vera bóndinn og ráði öllu. Hún vísar okkur til herbergja og segist geta boðið okkur uppá kaffi og smá með því, að sjálfsögðu sé innifalin morgunmatur með gistingunni. Einnig sýnir hún okkur þennan forláta heita pott sem er yfirbyggður, hann megum við nota að vild. Það líður ekki langur tími þangað til við erum allir komnir í heita pottinn með viðeigandi veigar, sumir í sundskýlum en einn okkar í svona gráleitum nærbuxum (voru örugglega einhverntíma hvítar). Við dveljum þarna í pottinum í smá tíma en síðan skal haldið að hóteli einu þarna ekki langt frá sem brann reyndar síðar. Þar skal borða góðan mat og fá sér gott rauðvín og einn bjór.

Heitur pottur

Bóndakonan ekur okkur þangað því eins og allir vita ökum við ekki eftir einn. Á hótelinu er smá bið (við erum vanir) eftir borði, því fáum við okkur einn bjór og hugsanlega eitthvað með honum. Biðin er frekar löng og því einn og einn bjór og eitthvað með. Við setjumst að borðum og það eru pantaðar eðal steikur og sá tímalausi pantar eðal rauðvín með endar lærður frá útlöndum eða “silgdur” eins og sagt er einhversstaðar. Kvöldið líður hratt og nú farið til baka með bóndakonunni sem bauðst til að sækja okkur líka. Strax og komið er að sveitabænum þá er ákveðið að fara í heita pottinn. Þar er lengi verið með einum bjór og svo verða menn að reyna með sér og það er tekið hressilega á því sem og að talað er hátt og varla svefnfriður þarna í sæta sveitahúsinu.

Það er allt í einu komin morgun og við mætum við morgunverðarborðið, nema sá tímalausi hann kemur seinna !! Bóndakonan er frekar fámál og ber á borð fyrir okkur staðgóðan morgunmat, en segir svo: Ég veit alveg hvað einn ykkar borðaði í gærkvöldi, honum hefur ekki þótt maturinn þarna á hótelinu góður, en óþarfi að færa mér hann hálfmeltan inná klósetti !! Menn segja lítið og horfa á hvorn annan en engin viðurkennir þessi endurskil á matnum góða ásamt einum bjór. Menn klárar sinn morgunmat, borga fyrir gistingu og kveðja bóndakonuna með þökkum, en hún segir lítið og ekkert heyrist um að við séum velkomnir aftur. Við klæðum okkur í viðeigandi fatnað fyrir ferðalagið til baka og hjólin sett í gang, veðrið er enn fallegt og lífið er gott. En þá kemur sá tímalausi og segist þurfa fá sér morgunmat og gera sig kláran, já það er eflaust kostur að vera tímalaus.

Mat skilað

Við erum varla lagðir af stað þegar öryggi fer í annað sinn á besta hjólinu (Norton) og sem betur fer er til annað aukaöryggi. Nokkrir kílómetrar og enn fer öryggið, nú er bara eitt eftir og því er skellt í, eigandi besta hjólsins þarf að hlusta á athugasemdir um að BSA og jafnvel Triumph séu betri hjól, kjaftæði eins og allir vita !! Ekki búið að aka lengi þegar öryggið fer aftur og um leið springur að aftan á besta hjólinu. Nú eru góð ráð dýr, ekkert öryggi til og sprungið dekk, en sem betur fer vorum við staddir rétt hjá vélaskemmu og þar inni er maður að gera við traktor. Afturdekkið er tekið undan og meðan eigandi besta hjólsins er að brasa við dekkið biður hann hámenntaðann vélstjóra í hópnum að græja öryggið með smá vírþræði sem sagt að nota ætti einn þráð af tugum þráða úr vírspotta sem með var í för. Sá hámenntaði segist kunna sitt fag og það þurfi ekkert að segja honum til. Með aðstoð mannsins í vélaskemmunni er slanga í dekkinu lagfærð, þessum traktors viðgerðarmanni og bónda finnst við hálf klaufalegir við þessa viðgerð og rífur af okkur slönguna og segist klára málið. Honum er þökkuð aðstoðin og við leggjum aftur í hann eftir smá bið eftir þeim tímalausa !!

 Gott öryggi

Besta hjólið er bara best og líður fram veginn og við nálgumst gatnamótin að Borgarnesi, öryggið heldur sem og viðgerðin á slöngunni. En Adam er ekki lengi í paradís því allt í einu stígur upp reykur frá besta hjólinu og það virðist kviknað í því, já þetta er heljarinnar reykmökkur og ökumaður besta hjólsins rífur hnakkinn af hjólinu til að aftengja eina öryggið sem hafði verið viðgert af þeim hámenntaða, en í stað þess að finna einn vírþráð utanum sprungna öryggið þá var þar heill vírbútur í stað öryggis og þessi vírbútur var sverasti hluti rafkerfi hjólsins. En besta hjólið brann ekki til ösku aðeins nokkuð stór hluti rafkerfi þess, þetta þekkja menn þegar smáspenna nær jörð. Þarna erum við strandaglópar allavega sá sem ekur besta hjólinu. En eins og oft áður þá kemur þarna aðsvífandi maður á bíl með kerru sem á sitja leyfar af gömlu bresku hjóli, þessi með kerruna er þekktur fyrir að kenna á bíl og dreyma um að vera formaður mótorhjólaklúbba (uss nei bara bull). Hann býðst til að setja besta hjólið á kerruna og koma því til byggða, ferðafélagar aðstoða við þetta og gera stöðugt grín að besta hjólinu, telja nota megi það sem akkeri á bát, eða selja það í brotjárn !!

Þýsk eitrun

Ferðin er á enda og þarna situr eigandi besta hjólsins í bíl og hlustar á sögur um lang bestu hjól heimsins sem eru að sögn bílstjóra björgunarbílsins þýsk og vélar þessara hjóla séu eins og tveggja strokka Volkswagen, eigandi besta hjólsins situr þarna og verður að játa því að eflaust séu þessir þýsku boxerar bara nokkuð góðir (úff hlýtur að vera erfitt að viðurkenna þetta án þess að brosa). Ætlar þetta ferðalag aldrei að enda, það hljóta allir að skilja það að hátt í tveggja klst. tal um þýsk gæði getur gert hvern mann bilaðann eða jafnvel komið viðkomandi til að trúa þessu. Ferðin tekur enda og sagan segir að eigandi besta hjólsins hafi þurft sálfræðiaðstoð til að losna við hugsun sýna um þýsk mótorhjól. En segja má frá því að besta hjólið varð aftur það besta eftir smávegilega lagfæringu á rafkerfi þess= Ferðalög þar sem ekkert gerist eru ekki ferðalög sem menn muna eftir !!!!!

Höfundur er óþekktur með öllu.

Sunday, 12 March 2017 11:24

Aldurinn

Aldurinn

(smá bullsaga sem getur átt við hvern sem er: Ekki satt !)

 

Ég hef og verð sá sem ekur hraðast í mínum eðal klúbb. Ég er bara lang bestur ekki spurning, ég hef meira segja átt SúúúSúkíí, ég hef átt fullt af hjólum, ég hef átt jafnvel mörg í einu. Ég hef farið í mjög margar ferðir með klúbbnum mínum og ég enda alltaf fyrstur, enda er ég bestur ekki satt !!! Ég nenni alls ekki að aka alltaf á löglegum hraða, já hver eiginlega gerir það, nema þá þeir sem eiga hægfara hjól.  Á þennan máta hef ég ekið öll þau ár sem ég hef átt mótorhjól (ég er nú ekki gamall).

Ég er langbestur

Ég man sérstaklega eftir einni langferðinni með klúbbnum mínum en við félagarnir fórum til vestfjarða. Ferðin vestur var frekar leiðinleg því oftast var ekið á nær löglegum hraða eða rétt um hundrað og hver eiginlega nennir því, ekki ég allavega, en ég lét mig hafa það vestur. Við nutum okkar vel þarna fyrir vestan og skoðuðum mikið, aðeins fengið sér í tána og borðaður góður matur í góðum félagsskap.

Hné niður hvað

Helginni er lokið og haldið skal heim á leið og menn halda hópinn til að byrja með, en ég (uss hvað er búið er að skrifa oft ÉG !!) en “ég” nenni þessu ekki til lengdar, það er skrúfað hressilega uppá rörið, enda er ég á alvöru hjóli, fjórir strokkar og sex gírar, ég er með nýtt stýri sem hentar betur en standard “clip-ons”. Hraðinn eykst og fljótlega sé ég rétta tölu á hraðamælinum 200 og nú erum við að tala saman, enda bjóða vegir okkar vel uppá þennan hraða !! Það eru nokkrir sem reyna að elta mig, en ég er bestur og því fljótlega eru það aðeins tveir sem sjást í speglum mínum. Umferð er nokkur og því þarf ég að taka nokkuð oft framúr hægfara blikkbeljum, með liði sem er að tala í símann eða að borða pulsur, já þetta “blikkbeljulið” fer ekkert eftir lögum skal ég segja ykkur !!!

Reykur

Fyrsta stoppið og ég þarf að setja bensín á hjólið, enda eyðir það nokkuð miklu þegar ekið er á “réttum” hraða ekki satt !! Ég er ekki búin að vera lengi þarna á bensínstöðinni þegar nokkrir félagar mínir renna í hlað, þeir horfa til mín og einn þeirra glottir svona góðlátlega og spyr: Ertu nýkomin ??!! Ég hugsa með mér “ég” læt þessa gæja ekki gera grín af mér, ég ætla að taka hressilega á því að næsta “pissustoppi” !! Ég spjalla lítilega við félaga mína og þeim fjölgar ört, þeir hafa allir ekið á ólöglegum hraða, uss fara menn ekki eftir lögum !!!

 

Ég prjóna frá bensíntöðinni og gef “græjunni” hressilega inn, það er fallegt veður og ég og hjólið erum í góðum gír. Ég horfi í baksýnisspeglana og sé að það eru þeir tveir sömu sem reyna, já þeir reyna að elta mig !! Fallega talan er komin á hraðamælinn og hraðinn eykst, bílar flauta á mig þegar ég ek framúr, já jafnvel nokkrir sem koma á móti blikka aðalljósum sínum, en ég hef ekki áhyggjur af því, nú er lífið gott og hraðinn réttur, beygjur eru einu vandamálin því jafnvel ég ek ekki í gegnum þær á 200+. Eina sem hindrar mig í því að fara í 300 er að vindhlífin á hjólinu er ekki mjög stór og það tekur vel í að halda sér í stýrið. Mikið er gaman að lifa og það er ekki langur tími þangað til ég kem að næsta stoppi. Ég tek af mér hjálminn og horfi í kringum mig, því ekki er hægt að skoða mikið þegar ekið er á “réttum” hraða, þetta er fallegt svæði, jafnvel bensíndælur skemma ekki útsýnið. En hver andskotinn þarna koma þeir tveir fyrstu, þeir hafa ekið á kolólöglegum hraða, þeir renna í hlað og enn og aftur spyr sá sami: Ertu nýkomin og brosir enn meira !!

Hver er lang lang bestur

Ég er komin til byggða og Mosfellsbær blasir við, svo er það aðeins lengra útá nesið mitt, þar bíður örugglega mín örugglega góður matur þegar ég kem heim og þetta hefur verið gott, ég er varla búin að sleppa þessum hugleiðingum þegar einn af félögum mínum fer framúr mér á ólöglegum hraða, já menn kunna ekki mikið í umferðareglum þessa lands !! Ég eins og venjulega ek rólega og ætla mér að komast öruggur heim. Nú er bara að bíða næstu ferðar.

Prjón 

Niðurlag: Það eru nokkrir mánuðir síðan ferðin var farin og ég er búin að kaupa mér hjól með tveimur hliðartöskum og topptösku einnig, það er meira segja rafmagnsrúða á hjólinu og þetta er svona hjól eins og löggan yrði ánægð með þ.e.a.s. hentar vel fyrir eldri borgara og þá sem vilja ekki fara of hratt, já ég tel að ALDURINN sé að færast yfir og hér eftir verð ég örugglega ekki fyrstur í lok ferða, heldur ferðast með “heldri/eldri” mönnum þar sem algjör hámarkshraði er 110 km klst, en Ég er enn bestur !

Höfundur er óþekktur !!!!!!