tekið af mbl.is
Bifhjólamönnum, sem hafa slasast alvarlega eða látist í umferðinni, hefur fækkað um 68% á milli ára. Þetta kom meðal annars fram á árlegum vorfundi bifhjólafólks sem haldinn var hjá Samgöngustofu í gær.
„Rædd voru ýmiss mál er varða öryggi og hagsmuni bifhjólafólks en á fundinum sátu m.a. fyrir svörum fulltrúar lögreglu, Vegagerðarinnar og Samgöngustofu. Fundurinn var opin öllum sem láta sig málefni bifhjólafólks varða. Samgöngustofa kynnti samantekt slysatölfræði ársins 2015 þar sem þung bifhjól komu við sögu. Í kynningunni kom fram að fjöldi slasaðra og látinna ökumanna þungra bifhjóla lækkar umtalsvert milli ára. Má sem dæmi nefna að samanlagður fjöldi alvarlega slasaðra og látinna árið 2014 var 28 en er kominn niður í 9 árið 2015. Þessi fækkun alvarlega slasaðra og látinna nemur um 68% milli ára,“ segir í fréttatilkynningu.
Fram kemur að óhætt sé að segja að átt hafi sér stað jákvæð þróun á undanförnum árum varðandi fækkun slysa meðal bifhjólamanna. Bornar saman við fjölda skráðra bifhjóla sýndu tölurnar að fækkun slysanna sé í öfugu hlutfalli við aukningu í fjölda skráðra þungra bifhjóla. Er þetta rakið meðal annars til aukinnar vitundar vegfarenda um bifhjól í umferðinni, fræðslu og upplýsingamiðlunar og fækkun í nýliðun bifhjólamanna.