tekið af mbl.is
Í síðustu viku samþykkti þing Evrópusambandsins ný lög sem segja að hlífðarfatnaður fyrir mótorhjólafólk verði að uppfylla evrópska staðla.
Hingað til hafa aðeins verið staðlar fyrir hanska, stígvél og persónuhlífar en nú er semsagt búið að bæta fatnaðinum sjálfum við. Þetta þýðir á mannamáli að innan örfárra ára verður allur mótorhjólafatnaður sem er seldur í Evrópu að uppfylla sama öryggisprófaða staðalinn. Fatnaðurinn verður að veita lágmarksvörn gegn núningi og höggi. Eins og á stígvélum og hönskum verður að vera miði innan á fatnaðinum sem staðfestir að fatnaðurinn uppfyllir kröfurnar sem til hans eru gerðar. Einnig verða að vera upplýsingar um viðhald, þvott, geymslu og notkun í gallanum. Ekki er enn ljóst nákvæmlega hvenær þessar kröfur verða að veruleika en búast má við að það verði innan fárra ára eins og áður sagði.
Lögbindur ekki notkun
Nýju lögin þýða ekki að mótorhjólafólki sé skylt að nota hlífðarfatnað, allavega ekki í öðrum löndum Evrópu. Þessi reglugerð er fyrst og fremst sett til að setja reglur á hvað er selt og hvað má ekki selja sem hlífðarfatnað. Að sögn aðalritara FEMA (Evrópusamtaka mótorhjólasamtaka), Dolf Willigers, hefur Evrópusambandið engar áætlanir um að setja lög um notkun hlífðarfatnaðs. „Þetta er neytendavörn sem við höfðum ekki áður. Svo lengi sem Evrópusambandið mun ekki nota lögin til að neyða fólk til að nota hlífðarfatnað fögnum við þessum lögum. Við munum líka sjá til þess að það gerist ekki,“ sagði Dolf Willigers um nýju lögin. Formaður Snigla, Hrönn Bjargar Harðardóttir, er ekki eins bjartsýn. „Sett voru lög fyrir nokkrum árum síðan á Íslandi sem skylda mótorhjólafólk til að nota hlífðarfatnað,“ sagði Hrönn í viðtali við Morgunblaðið. „Lögin höfðu að hluta til öfug áhrif, fram að lagasetningu hafði notkun hlífðarfatnaðar ekki verið sýnilegt vandamál en eftir gildistöku laganna fór meira að bera á því að fólk notaði ekki hlífðarfatnað, sumir mögulega í mótmælaskyni,“ sagði Hrönn. Sniglar hafa áhyggjur af því að lögin verði mögulega nýtt á rangan hátt til stuðnings hlífðarfatnaðarskyldunni hérlendis, þó svo að þeim sé eingöngu ætlað að vernda kaupendur. „Auðvitað er það gott mál að allir noti hlífðarfatnað en það á að vera val hvers og eins, hversu mikinn hlífðarfatnað hann eða hún notar, af hvaða gerð eða þess vegna hvaðan hann er keyptur. Þeir sem vilja góðan hlífðarfatnað gætu hinsvegar nýtt lögin til að sjá hvaða fatnaður uppfyllir bestu staðlana,“ sagði Hrönn ennfremur.
Flest mótorhjólafólk á Íslandi telur sjálfsagt og eðlilegt að nota hlífðarfatnað á mótorhjólum, segir Hrönn Bjargar Harðardóttir, formaður Snigla.
This email address is being protected from spambots. You need JavaScript enabled to view it.