tekið af mbl.is
Fjöldi nýrra mótorhjóla frumsýndur
Nýtt Moto Guzzi V9 hefur þegar verið frumsýnt en margra nýrra ítalskra hjóla er að vænta á EICMA.
Í dag opnar EICMA-mótorhjólasýningin í Mílanó sali sína fyrir forvitnum sýningargestum en hún er eina stóra mótorhjólasýning ársins ef frá er talin Tokyo Motor Show þar sem Intermot-sýningin í Þýskalandi er aðeins haldin annað hvert ár.
Margt nýrra gerða verður að sjá og sumar þeirra þegar komnar fram í dagsljósið með myndum frá framleiðendum. Þar sem sýningin var opnuð í dag er ekki mögulegt að sýna myndir frá henni í þessu blaði en við munum gera því betri skil í næsta þriðjudagsblaði. Þangað til skulum við skyggnast aðeins inn fyrir tjöldin og sjá það helsta frá stærstu framleiðendunum.
Ítalirnir fyrirferðarmiklir
Ítölsku framleiðendurnir verða fyrirferðarmiklir eins og oft áður á EICMA enda sýningin á ítalskri grund. Bimota er að vakna úr dvala með tvær nýjar gerðir, Tesi 3D RaceCafe-hjólið og Impeto; nakið götuhjól sem notast við sömu vél og Ducati Diavel en með forþjöppu fer það hjól yfir 190 hestöfl. Ducati er með níu frumsýningar á EICMA en þau sem munu vekja mesta athygli eru nýtt Multistrada 1200 með meiri torfærueiginleika og að öllum líkindum minni útgáfa Scrambler-hjólsins. Einnig er að vænta nýs Diavel-hjóls með reimdrifi en það er kallað X og verður enn meir í stíl við Victory og Harley-Davidson en áður. MV Agusta er með tvær nýjar uppfærslur og Aprilia mun allavega sýna 230 hestafla ofurhjól þótt lítið hafi frést meira frá þeim framleiðanda. Loks er Moto Guzzi að koma með fjögur ný hjól en það eina sem sést hefur fyrir sýninguna er V9, sem er nokkurs konar retro-hjól í stíl við Triumph Bonneville.
Fimm ný hjól frá BMW
Af öðrum Evrópulöndum er mest að frétta frá Þýskalandi en BMW verður með fimm ný hjól á sýningunni auk tilraunarafhjóls sem byggist á RR og kallast einfaldlega eRR. Stærstu fréttirnar eru eflaust nýtt Scrambler-hjól sem þegar hefur komið í tilraunaútfærslu og nýtt hjól af smærri gerðinni sem er G310R hjólið. Auk þess koma nýtt G650 Sport, G650 GT og nýtt F-hjól. KTM mun frumsýna nýtt 690 Duke með nýjum mótor sem og nýtt 1290 Super Duke GT-ferðahjól. Auk þess er von á sérútgáfu af Super Duke R sem nokkurs konar tilraunaverkefni. Husqvarna mun sýna framleiðsluútgáfur 701-hjólanna en líklegt er að 401-hjólin fái að bíða þar til á næsta ári þótt ekkert sé hægt að segja um það ennþá. Triumph mun frumsýna vatnskældar útgáfur Bonneville og Thruxton sem og ný Speed Triple S og R, en einnig er von á uppfærslu af Tiger Explorer 1200.
Tvö ný forþjöppuhjól?
Það er aðeins erfiðara að lesa í japönsku framleiðendurna þar sem ekki hefur verið mikið um frumsýningar fyrir sýninguna sjálfa. Honda mun að öllum líkindum sýna tvö ný 250 rsm hjól, CRF250 Rally og CBR250 RR, en ekki er talið líklegt að við fáum að sjá nýtt 1000-hjól strax. Kawasaki og Suzuki munu örugglega bæði hafa ný tveggja strokka forþjöppuhjól til sýnis en Suzuki frumsýndi sína vél á sýningunni í Tókýó nýlega. Suzuki og Kawasaki hafa með sér samstarf um marga hluti og því má vænta að bæði Suzuki Recursion og Kawasaki S2 verði frumsýnd á EICMA. Spurningin er hvort Suzuki muni einnig sýna nýjar útgáfur GSX-R-hjólanna en það á eftir að koma í ljós. Yamaha á 60 ára afmæli á þessu ári og því er líklegt að við munum sjá eitthvað nýtt frá þeim, þótt aðeins hafi verið „strítt“ með myndum af nýju MT 150 rsm hjóli en vonandi verður nýtt R6-hjól einnig frumsýnt.
This email address is being protected from spambots. You need JavaScript enabled to view it.
BMW frumsýndi á dögunum nýtt G310R-hjól sem er minnsta hjólið sem BMW framleiðir og er unnið í samstarfi við indverska framleiðandann TVS.
Suzuki frumsýndi forþjöppuvélina í tilraunahjóli á Tokyo Motor Show nýlega en framleiðsluútgáfu er að vænta á EICMA í ár.