tekið af mbl.is
„Viljirðu vinna, fáðu þér þá Finna,“ er þekktur frasi úr akstursíþróttunum. Og hann virðist eiga býsna vel við um Niklas Ajo, finnskan knapa sem keppir á KTM-hjóli í Moto3 heimsmeistarakeppninni.
Í hinu ótrúlega myndskeiði sem fylgir þessari frétt má sjá hvernig Ajo tókst að hanga á hjólinu eftir árekstur í lokabeygjum mótsins í Assen í Hollandi um nýliðna helgi. Var hann í harðri og jafnri keppni um áttunda sæti er samstuð olli því að hann hentist af hjólinu.
Allt stefndi í að fákurinn hafnaði utanbrautar með skell á öryggisvegg. En Ajo hékk á stýrinu og krjúpandi eftir jörðinni tókst honum að sveigja frá veggnum og inn á brautina aftur, við mikinn fögnuð áhorfenda.
Spyrja má hvort mótorhjólamanni hafi nokkurn tíma tekist að bjarga hjóli sínu og koma sér í endamark með þessum einkennilega hætti?
„Ég var virkilega heppinn að skella ekki á veggnum. Ég vildi bara bjarga mér og koma mér yfir marklínuna sem svo stutt var í. Það tókst ogg ég kláraði,“ sagði gallharði Finninn Niklas Ajo eftir keppnina.
Myndskeiðið sem hér fer á eftir segir annars alla söguna:
https://www.youtube.com/watch?v=m_bIaupAeSE&feature=player_embedded